في بلدي أشياء أبدا لا تذكر

في بلدي أشياء أبدا لا تذكر

خذ مثلا

في بلدي الثورة فعُل منكر

صنعت فوضي

أضرت بسوق البُورصة

فعل منكر

في بلدي أشياء أبدا لا تذكر

مثلا أخر

الجيش خط أحمر

يسحل

يدهس

يقتل

أحزر

الجيش خط أحمر

في بلدي أشياء أبدا لا تذكر

مثلا أخر

الثوار

في بلدي جلبوا العار

أخذونا من جنة خلدا

للدرك الأسفل للنار

حرقوا اليابس والأخضر

في بلدي أشياء أبدا  لا تذكر

والتغيير

ليس الآن

فهناك أشياء أولي

في الحسبان

والشهداء

يرحمهم ربي

ولا عزاء

في بلدي أشياء أبدا لا تذكر

وأخيرا

سجل أني أأسف للسابق ذكره

يسقط .. يسقط حكم العسكر

يسقط .. يسقط حكم العسكر

يسقط .. يسقط حكم العسكر

في بلدي أشياء أبدا لا تذكر

ــــــــــــــــــــــــــــــــــــــــــــــــــــ
khaled elsanosy

بيعتى نفسك ما بيعتنيش

وأيه يعنى تسيبينى
وتبيعيني
فاكرانى أيه...
حاجه من حاجاتك
وقت ما تحبى تشوفيها
من مكانها
تطلعيها.. تحضنيها
......
ووقت ما تملى
تسيبيها ..تهمليها
فاكرانى أيه ...
انا اسف
علي وقتى
اللى ضيعته في دروبك
ومش اسف
على قلبى
اللى علمته القسوة في وجودك
خلاص أنسي
انتي يوم ما بيعتينى
بيعتى نفسك
ما بيعتنيش
ــــــــــــــــــــــــــــــــــــــــــــــــــــ
khaled elsanosy

خيال مأته

خيال مأته شغلتي

يعني

لا منصب ولا جاه

وكل طلبى فى الحياه

ما تخفوش منى

وأضحكولي من قلوبكم

وأحكولى  كل الحكاوي

عنكم وعن غيركم

تعبتني غربتي

ووعد مني 

عمري ما حغير شغلتى

خيال مأته 

ـــــــــــــــــــــــــــــــــ

khaled elsanosy

السارق

عشمتنى بالحلق
خرمت أنا ودانى
ملعون تلاتين أبوك
ياسارق كل أحلامى

 

ـــــــــــــــــــــــــــــــــ

khaled elsanosy

عائدون

وظلمك ليا مش قابلة
ولا قابل دخول سجنك
ورافع راية العصيان
على حكمك واحكامك
وملعون في كل كتاب
ياسارق الاحلام
خلاص ان الاوان
ترحل

ـــــــــــــــــــــــــــــــــ

khaled elsanosy

حالمون

أنا ......
مثل كل الناس أحلم
بالوطن الجديد
مثل كل الناس أحلم
لكن غيري لايريد
شئ غريب
لكننا ..
سنظل دوما حالمون
بالوطن الجديد

ـــــــــــــــــــــــــــــــــــــــــــــــــــــــــــــــ
khaled elsanosy

بدون وش

وأيه يعني بدون وش
غيري عايشها
غش في غش
وغيري شايف نفسه باشا
وتلاقي منو تلاتة بقرش
صدقني ما تفرقش
بوش زي من غير وش
ماتفرقش

ـــــــــــــــــــــــــــــــــــــــــــــــــــــــــــــــ
khaled elsanosy

دروب السعادة

أيها السائرون
علي دروب السعادة
أذكرونا......
لعلها تستدعينا يوما
لنسير عليها

ـــــــــــــــــــــــــــــــــــــــــــــــــــــــــــــــ
khaled elsanosy

 

كون حلم

مـا معنـي أن تُظلـم ... والظلم حـرام
ما معني أن تصمت ... والصمت مهانة
ما معني أن تحلم ويصير الحلم سراب
أصرخ أو أفعل شئ
كون حلم
واسعي في تحقيق الحلم
لكن لا تجعل من نفسك دمية
تتلقها الأيدي بأمان
كن إنسان
أو في الأدنى
احمل بعضا من أوصاف الإنسان
لكن لا تبقي جبان
أخلع عنك الخوف
أعلنها
لقد حان
أن تتذوق طعم الحرية
أن تجعلها منهاج حياة
أجعل منها دستورا
يحمل كل معاني العدل
وكيفية تحقيق الأحلام
لكن أبدا ..لا تذكر فيه
الصمت ومشتقاته من ذلا وهوان

ـــــــــــــــــــــــــــــــــــــــــــــــــــــــــــــــ
khaled elsanosy

حلمي لوطن

أرسم علي الحيطة وطن
أرسم بيوت
أرسم شجر
وشمس ساطعة منورة
أيادي ماسكة في بعضها
وقلوب تخاف علي بعضها
أرسم وشوش مليانه بالبسمة
عقول مليانه بالحكمة
أرسم أمل
أرسم عمل
أرسم علم
نقف وراه كلنا
وقبل ألوانك ماتخلص
أكتب فوق رسمتك
هو دا حلمي لوطن

ـــــــــــــــــــــــــــــــــــــــــــــــــــــــــــــــ
khaled elsanosy

ثم رحل

نظر لعينيها وأطال النظر
لاحظت !
تعجبت فسألته ماذا بك ؟
صمت قليلا وأجاب
أني أحبك
ثم رحل

ـــــــــــــــــــــــــــــــــــــــــــــــــــــــــــــــ
khaled elsanosy

 

حالات

حالات
حالة سعادة
او حالة ملل وكئابة
حالة كسل
او حالة نشاط
...وساعات
تيجي حالة
من غير مسميات
هي كدة الحياة
شوية حالات

ـــــــــــــــــــــــــــــــــــــــــــــــــــــــــــــــ
khaled elsanosy

ارحلوا

علي غرار ثلاثي اضواء المسرح
لو كانوا كلمونا
لو كانوا سمعونا
قبل مايقتلونا
وقبل مايضربونا
وقبل مايسحلونا
عارفين كنا نقول ايه
كنا نقول إرحمونا
وبلاش تعقدونا
لوجه الله إعتقونا
أرحلوا وريحونا
من الغلب اللي احنا فيه
دي بلدنا
ودي ثورتنا
سيبونا بحريتنا
نعمر ..نبني بلدنا
وكفايه كدا يابيه

ـــــــــــــــــــــــــــــــــــــــــــــــــــــــــــــــ
khaled elsanosy

ما رحوش مدرسة

زمان
لما كنا صغيرين في المدرسة
علمونا حاجات كتيرة كويسة
علمونا طاعة ربنا وحب الوطن
وان الطريق طويل
مليان مشقة مليان عمل
والظلم نهايته سوده
وان العدل نور
بس في حاجة محيراني
هما ليه اللي بيحكمونا
ما بيعملوش كدا ؟
جايز ....
ما رحوش مدرسة

ـــــــــــــــــــــــــــــــــــــــــــــــــــــــــــــــ
khaled elsanosy

وصية

أجبروه في أيامه الأخيرة
علي كتابة وصيتة الأخيرة
أدمعت عيناه
فكتب
لا يرثني من يقرأ تلك الوصية
ثم مات

ـــــــــــــــــــــــــــــــــــــــــــــــــــــــــــــــ
khaled elsanosy

غرباء

سألوا علينا ..
أجابوهم
عاشوا بيننا
ولكن غرباء

ـــــــــــــــــــــــــــــــــــــــــــــــــــــــــــــــ
khaled elsanosy

بيننا

شئ جميل بيننا
أراد جمع قلوبنا
أن يحقق حلمنا
أن تسعد ايامنا
حبيبتي
ما أجمل مابيننا

ـــــــــــــــــــــــــــــــــــــــــــــــــــــــــــــــ
khaled elsanosy

حضوروأنصراف

دفتر حضوروأنصراف
الكل لازم يوقع علي الحضور
والكل لازم يوقع انصراف
وبين الحضور والانصراف
حاجات كتير
فينا اللي فاهمها
وفينا اللي فاهمها غلط
وفينا اللي مش فاهم اساسا
اي حاجه
فينا اللي بعزق واللي حوش
فينا اللي كوش واللي طنش
وفينا اللي خلاها علي الله
فينا وفبنا
فينا العبيط واللي عامل فيها عبيط
فيناالحدق واللي عامل فيها حدق
وفينا الكويس واللي عامل فيها كويس
مين حيدخل في الضماير
فينا وفينا
فينا اللي قوي فينا الضعيف
فينا الحرامي وفينا الشريف
فينا المنافق وفينا الصريح
واللي بيرقص علي السلالم
علي كل لون علشان يعيش
فينا وفينا
بس لازم نوقع علي الحضور
ولازم علي الانصراف
وكل واحد حسب خطه
في الحضور والانصراف

ـــــــــــــــــــــــــــــــــــــــــــــــــــــــــــــــ
khaled elsanosy

ليل طويل

ليل طويل وحزن أطول
وحاجات كتير مكلكعة
انفاس مليانة غضب
اجساد كسيها التعب
وعيون تعبت من العتمة
وشوش شابت في عز الصبي
اللي واجم
اللي عابس
واللي كاره نفسه أصلا
غصب عنهم
المكان مليان عفن
والحيطان مدهونة ضلمة
والببان متسلسلة متقفلة
وكل ماالفجر يطلع يتقتل
والسؤال ؟
هي حالة مؤقتة
ولاموضوع وانتهي

ـــــــــــــــــــــــــــــــــــــــــــــــــــــــــــــــ
khaled elsanosy

أحلى ضحكة

أحلى ضحكة
أحلى ضحكة بتتولد
لما تكون من غير سبب
عايز نصحتى
جربها مرة بس من قلبك
وإياك تخاف منها
إسأل مجرب
الضحكة دى
شالت كتير من التعب

ـــــــــــــــــــــــــــــــــــــــــــــــــــــــــــــــ
khaled elsanosy

ما تمنعهاش

وضحكة تيجى وضحكة تروح
وضحكة ترسم فرح
وتانية تهدى جروح
وساعات بنضحك مجاملة
وممكن من كتر الهموم
لو ضحكة جاتك ما تمنعهاش
اضحكها من قلبك
ما تمنعهاش

ـــــــــــــــــــــــــــــــــــــــــــــــــــــــــــــــ
khaled elsanosy

ياقلبى

ياقلبى
يالى الحزن ساكن بيوتك
امتى حتفرح
امتى الدنيا تضحكلك
صعبان عليا ياقلبى
لكن نصيبك كدا
الحزن يملاك
والضحكة تعدى عليك
لا تشوفها ولا تشوفك

ـــــــــــــــــــــــــــــــــــــــــــــــــــــــــــــــ
khaled elsanosy

الغلط مردود

معلش
غلطتى والغلط مردود
كان قلبى طيب
كل همه الونس
وشويه حنان
غلبان
كان لازم عليه يتقرص
علشان يعيش فى أمان

ـــــــــــــــــــــــــــــــــــــــــــــــــــــــــــــــ
khaled elsanosy

لاجديد

ارسم ميزان
كفة حرية وكفة عدالة
وارسم فانوس
طالع منه نور
وارسم الهلال والجمل
وأكتب بالبنط العريض
لاجديد... لاجديد

 

ـــــــــــــــــــــــــــــــــــــــــــــــــــــــــــــــ
khaled elsanosy

عندي أمل

في نفس المكان
من كام سنة
كل يوم باجى هنا
جايب معايا ورد من اللى بتحبيه
وحافظ كل الكلام الحلو
اللى ياما قولتهولك وفرحتي بيه
وحشتيني
وحشني حضنك ضحكتك
شابت عيوني
عندي أمل
وعايش عليه

ـــــــــــــــــــــــــــــــــــــــــــــــــــــــــــــــ
khaled elsanosy

 

شعاع نور ولا الف عتمه

دور ع النور فى
كل مكان
وامسك فيه
دي العتمه وحشه
وملهاش امان
وان ما عرفتش
اسأل
جايز تلاقيه
تسكن فيه
شعاع نور ولا الف عتمه

ـــــــــــــــــــــــــــــــــــــــــــــــــــــــــــــــ
khaled elsanosy

 

على كل لون

على كل لون
ياصاحبى
علي كل لون
تروح بلون
ترجع بلون
وفى السكون تعمل هياج
وفى الهياج تعمل سكون
صعبان على ياصاحبى
امتى تتعلم ياصاحبى
م اللى فات
خايف عليك تندم
وتبقى سطر من ذكريات

ـــــــــــــــــــــــــــــــــــــــــــــــــــــــــــــــ
khaled elsanosy

من فيلم .. إعادة انتاج النظام

من فيلم .. إعادة انتاج النظام ..

قاموا بثورة ... وأيه يعنى
مش مهم
دول ناس غلابة
بكرة ينسوا كل حاجة
هي يادوب حبه غلاسة
مع كام قانون
من الهما في السياسة
والغياب الامني اهم حاجة
يرجعوا يقولوا ياريت
ماقمتش ثورة
مش بقلك ناس غلابة
بكرة ينسوا كل حاجة
.. الثورة فكرة ومش حتموت علي فكرة ...

ـــــــــــــــــــــــــــــــــــــــــــــــــــــــــــــــ
khaled elsanosy

درساً

وصمتاً
يعطني درساً
عن الدنيا وما فيها
وأضحك خلسة
علي نفسي
ويرجع صدي ضحكي
آلام اعانيها
ــــــــــــــــــــــــــــــــــــــ
khaled elsanosy